Meeqqavut 2000

Immikkut pisussat

Isumasioqatigiinnissap Meeqqavut 2000-ip nalaani kulturikkut pisussatut makku taaneqarsinnaapput; Ammaanersioreernerup kingorna minutsit 20-it missaani erinarsortartoq tusaamaneqarluartoq
Ulf Fleischer erinarsorluni aliikkusersuissaaq. Ulf F. naggataarnersiornerup nalaani aamma nipilersorlunilu erinarsoqqissaaq. Sisamanngornermi unnukkut nal. 19.30. GU-p katiinaani Aagga Dam-ip isiginnaagassiaa "Asanninneq Ilumoortoq" takutinneqassaaq. Tallimanngornermi naggataarnersiornermi oqareernitsitut Ulf Fleischer aliikkersuissaaq aammalu taassuma saniatigut nipilersortartut maanimiut "Isummat" nipilersussapput ilaatigut tusaamaneqarlualersimasut erinarsortartut uku erinarsortoralugit; Pilu Lynge aamma Aviaq Grønvold. Taassuma saniatigut isiginnaartitsisartut/quiasaarisartut "Tariisia" & "Aataqataa" alias Rosa Olsen & Piitaanguaq Alaufesen nerinerup nalaani aliikkusersuissapput.

Kujataarmiut eqqarsaatigalugit, qimussilaarnissamut periarfissaqarsinnaavoq  periarfissaqartoqassappat/Piffissaqartoqassappat.

Taassuma saniatigut periarfissaqarportaaq soqutiginnittoqaruni ASP-ip ujakkaarutaanik attartorsinnaaneq.

Eqqumiitsuliortoq Kiiu Olsen Qeqertarsuarmiu isumasioqatigiinnerup nalaani katersortarfiup ineeraani qalipakkaminik saqqummersitsissaaq. Soqutiginnittut pisisinnaanissaminnut periarfissaqassapput.

Ulloq takisooq oqimaatsorlu atoreerlugu, nuannersuussagaluarpoq periarfissat qulaaniittut atorluassallugit. Illoqarfik qimalaarlugu, pinngortitarsuaq alianaatsoq tikillugu aamma nuannerlunilu qasuersaarnartarmat, peqqinnarlunilu pissatsinnartuummat.

Peqataalluarisi.

Peter Olsen